«قصص_الأنبياء» #الحلقة_الثالثة_عشرة #قصة_إبراهيم(٣) #إسماعيل_الذبيح #قصة_زمزم كنا واقفين عند إبراهيم عليه السلام لما خرج من مصر ومعاه سارة وهاجر وراحوا لفلسطين .. كان إبراهيم عليه السلام كَبُر في السن ومكنش عنده أولاد فتمنى إنه يكون عنده ولد، فدعا ربنا إنه يرزقه طفل وكانت زوجته سارة عقيم لا تلد، "رَبِّ هَبْ لِي مِنَ الصَّالِحِينَ * فَبَشَّرْنَاهُ بِغُلَامٍ حَلِيمٍ " فوهبت سارة لإبراهيم عليه السلام هاجر وبقت ملك يمين، وملك اليمين زيها زي الزوجة من ناحية المعاشرة، فحملت هاجر وولدت إسماعيل عليه السلام وطبعا كأي أب إبراهيم عليه السلام اتعلق بإسماعيل، وكمان هنا الوضع مختلف لأن الولد جه لأب كبير في السن فكان اهتمامه بيه مضاعف،فهنا سارة غارت.. مع إنها هي إللي وهبت هاجر لإبراهيم عليه السلام عشان تخلف له ولد، لكن طبيعة النساء تغلب.. فربنا رأفة بسارة أمر إبراهيم عليه السلام إنه ياخد هاجر وابنها الرضيع إسماعيل ويوديهم مكان تاني وهو مكة، خدوا بالكم إن ربنا لما يريد شيء بيهيء له أسباب.. بمعنى إن بعدين ربنا هيأمر إبراهيم وإسماعيل عليهما السلام إنهم يبنوا البيت الحرام، طيب هيبنوه إزاي وهم أصلا قاعدين في فلسطين والبيت الحرام هيكون في مكة؟ وكمان ساعتها مكة كانت صحراء ومكنش في حد عايش هناك ولا كان في زمزم لسه ولا كان في أي حاجة...فإزاي بقى؟ فبتقدير من ربنا سارة غارت وبالتالي ربنا أمر إبراهيم عليه السلام إنه يأخذ هاجر وإسماعيل لمكة عشان يهيء الأسباب إن البيت الحرام يتبنى.. إبراهيم عليه السلام أخذ هاجر وإسماعيل وسافروا لمكة عند البيت الحرام ومكنش لسه اتبنى وكان أرض صحراء، ساب لها قربة ماء وجراب فيه تمر يعني نقدر نقول إزازة مية وكيس تمر، وبعدين سابهم ومشي، فهي استغربت وقعدت تنادي عليه: يا إبراهيم إنت سايبنا لمين هنا وماشي؟ وهو مش بيبص لها ومش بيرد ومكمل مشي. وهي تنادي عليه وتكرر نفس السؤال ،فهي حست إن في حاجة، فسألته : هو ربنا إللي أمرك بكده؟ فالْتَفَت وقال نعم.. فقالت بكل ثقة : إذاً لن يضيعنا بعد ما إبراهيم عليه السلام مشي بعيد عنهم رفع إيده للسماء وقال يارب أنا تركت أهلي في مكان مفهوش زرع عند بيتك المحرم فاجعل بعض من عبادك يروحوا يسكنوا معاهم وارزقهم برزقك "رَبَّنَا إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ ،فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ" كانت هاجر بتاكل من التمر وتشرب من الماء إللي كان معاها وترضع إسماعيل، لحد ما المية والتمر خلصوا واللبن في صدرها جف، وكان إسماعيل بيبكي من الجوع،فهي مقدرتش تستحمل إنها تشوفه كده فقامت تدور على أي حاجة أكل أو مايه أو أي إنسان .. فطلعت على جبل الصفا فملقتش حاجة وطلعت على جبل المروة ملقتش حاجة فضلت تطلع وتنزل من الجبل ده للجبل ده ٧ مرات امرأة جعانة، عطشانة،مرهقة ابنها بيعيط من الجوع😔 وفي وسط كل الأزمات دي تبص على إسماعيل عليه السلام فتلاقي المية بتطلع من عند رجله، وكان جبريل عليه السلام كان قد ضرب الأرض بطرف جناحه فطلع الماء، فلما شافت الماء قعدت تحوط عليه بإيديها وتقول زُم زُم ، عشان كده اتسمى الماء بزمزم ، وبقت تاخد من المية تحط في القِربة إللي كانت معاها والماية عمالة تفور وتزيد وبدأت الطيور تتجمع لأن الطيور بتيجي على المكان إللي فيه ماء، في الوقت ده كان في قبيلة اسمها (جُرْهم) معدية من المكان فشافوا الطيور وقالوا أكيد في مية في المكان ده خلونا نروح نشوف! وقبيلة جُرهم دي من العرب العاربة يعني العرب إللي بيتكلموا اللغة العربية . فالعرب قبل إسماعيل عليه السلام إسمهم العرب العاربة وكان منهم قبائل كثير زي عاد وثمود ومدين إللي قلنا على أنبياؤهم قبل كده إنهم عرب. وكان من القبائل العربية دي قبيلة جُرْهم إللي كانت معدية وقت فوران ماء زمزم ، فلما وصلوا عند هاجر وإسماعيل وشافوا المية قالوا لها:ممكن نسكن في المكان هنا معاكي ؟ قالت لهم ماشي بس البئر ده باسمنا ..قالوا :أكيد ! فبعتوا بقى جابوا أهلهم واستقروا في مكة عند بئر زمزم. بدأ إسماعيل عليه السلام يكبر ويتعلم منهم اللغة العربية ، وكان هو أول من نطق باللغة العربية الفصحى المعروفة إللي نزل بيها القرآن، والعرب ورثوا الفصاحة عن إسماعيل عليه السلام فالعرب إللي جم بعد كده من ذرية إسماعيل عليه السلام ومنهم محمد صلى الله عليه وسلم اسمهم العرب المستعربة، لأنهم اتعلموا اللسان العربي من قبيلة جرهم .. ●بالنسبة لإبراهيم عليه السلام كان بيتكلم باللغة الآرامية أو السريانية وهي لغة بين اللغة العربية القديمة واللغة العربية بتاعتنا إللي إحنا عارفينها .. كان إبراهيم عليه السلام بييجي يزور هاجر وإسماعيل عليه السلام كل فترة وقيل كل شهر، كان إبراهيم عليه السلام يحب إسماعيل لأنه كان ولده الوحيد ساعتها وكان ابنه البكر وكمان اتولد بعد زمن طويل فكان له مكانة عظيمة في قلبه، لكن إبراهيم عليه السلام كان خليل الله .. والخِلة دي منزلة عظيمة لازم يكون فيها القلب فاضي من حب كل شيء إلا حب الله...فعشان كده ربنا ابتلى إبراهيم ابتلاء عظيم جدا .. ربنا أراد أن يختبر إبراهيم عليه السلام في صدق محبته لله ومين إللي في قلب إبراهيم عليه السلام حبه أكبر وهل هيقدم حبه لابنه على أوامر الله ولا هيعمل العكس؟ طبعا إحنا عارفين إن رؤيا الأنبياء وحي ! فرأى إبراهيم عليه السلام رؤيا إنه بيذبح ابنه.. "فَلَمَّا بَلَغَ مَعَهُ السَّعْيَ قَالَ يَابُنَيَّ إِنِّي أَرَى فِي الْمَنَامِ أَنِّي أَذْبَحُكَ" طبعا ده معناه إن ربنا بيأمره إنه يذبح ابنه. متخيلين الصدمة إللي إبراهيم عليه السلام فيها! ده جاله الأمر بذبح ابنه البكر الوحيد إللي اتولد له بعد ٨٤ سنة ،يعني مش إن ابنه هيموت لأ ده إنت إللي هتذبحه يا إبراهيم بإيدك طيب هيعمل إيه ويتصرف إزاي! إبراهيم عليه السلام لأنه يعلم علم اليقين إن ابنه ده مش بتاعه وإن ربنا هو إللي رزقه بيه، سلم الأمر لله بكل رضا وطمأنينة و بدون أي انزعاج، وراح لإسماعيل عليه السلام وأخبره بالموضوع، قاله ربنا امرني اذبحك "فَانْظُرْ مَاذَا تَرَى"؟ وكان ساعتها إسماعيل كبر وبقى يعتمد على نفسه ويشوف مصالحه،وإبراهيم عليه السلام بيعلمنا منهج تربوي مع عيالنا وهو إننا نستشيرهم في الأمور إللي تخصهم.. إبراهيم عليه السلام مرحش خد إسماعيل عليه وذبحه وخلاص انتهى الموضوع. مع إن ده أمر إلهي مفيش فيه أي مجال للعصيان ومع ذلك أشركه معاه في الموضوع لأنها حاجة خاصة بيه، وكمان عشان يشرك ابنه معاه في اجر الصبر والإحتساب.. فإسماعيل عليه السلام رد بكل صبر واستسلام لله وقال:( يا أبتِ افعل ما تؤمر ستجدني إن شاء الله من الصابرين) وهنا إسماعيل عليه السلام استعان بربنا وتقبل أمر ربنا بكل صبر ويقين .. فلما خلاص حطه على وشه وأخفى إسماعيل عليه السلام وشه عشان أبوه متتغلبش عليه الشفقة فيتراجع عن الذبح، فَلَمَّا أَسْلَمَا وَتَلَّهُ لِلْجَبِينِ " وفعلا يبدأ إبراهيم بذبح ابنه لكن السكين لم تقطع ! زي النار التي لم تحرق ..فالأشياء ملهاش القدرة بذاتها ولكن بأمر الله وبس.. إبراهيم عليه السلام استغرب السكين مش راضية تذبح !! وإسماعيل عليه السلام مستني آخر لحظات حياته وحاسس بالسكين بتتحرك على رقبته بس مفيش ألم إيه الحكاية ظ وفي اللحظة دي يسمعوا منادي بينادي.. مين هو المنادي ؟ وعايز إيه ؟ وليه السكين مذبحتش إسماعيل عليه السلام؟ ده إللي هنعرفه المرة الجاية إن شاء الله ..💚💚💚💚💚💚💚🌴 لا تنسو الدعاء لأخواننا في فلسطين اجمعين😔♥️🇵🇸

«قصص_الأنبياء» #الحلقة_الثانية_عشرة #قصة_إبراهيم(٢) وقفنا المرة إللي فاتت عند إبراهيم عليه السلام لما كسّر الأصنام كلها ماعدا أكبر واحد فيهم، وعلق الفأس عليه، وبعدين قومه لما رجعوا من العيد بتاعهم وراحوا يشوفوا الآلهة لقوهم متكسرين ، وسألوا مين إللي عمل فيهم كده، فبعض الناس قالوا إحنا سمعنا شاب اسمه إبراهيم بينتقص الآلهة بتاعتنا ويذكرها بالسوء، فقالوا هاتوه قصاد الناس كلهم عشان يشهدوا عليه، وفعلا جابوا إبراهيم عليه السلام وسألوه قصاد الناس كلهم : إنت إللي كسرت آلهتنا يا إبراهيم ؟ (قَالُوا أَأَنتَ فَعَلْتَ هَٰذَا بِآلِهَتِنَا يَا إِبْرَاهِيمُ) ؟ قال لهم إبراهيم : بل فعله كبيرهم هذا فاسألوهم إن كانوا لو ينطقون "قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِنْ كَانُوا يَنْطِقُونَ" هم دلوقتي اتزنقوا يا إما يعترفوا بالحق إن الجماد ده إللي هم صنعوه ومش بيتحرك ميقدرش يعمل كده، يا إما يقولوا معاك حق يا إبراهيم فعلا إنت بريء والإله ده هو إللي كسر الأصنام التانية هنا قوم إبراهيم عليه السلام راجعوا نفسهم كده شوية وقالوا لبعض إحنا إللي غلط وظالمين !(فَرَجَعُوا إِلَىٰ أَنفُسِهِمْ فَقَالُوا إِنَّكُمْ أَنتُمُ الظَّالِمُونَ) لكم الكبر طبعا خلاهم رجعوا عن كلامهم ده واستكبروا عن اتباع الحق وقالوا لإبراهيم مانت عارف إنهم مش بيتكلموا! ثُمَّ نُكِسُوا عَلَىٰ رُءُوسِهِمْ لَقَدْ عَلِمْتَ مَا هَٰؤُلَاءِ يَنطِقُونَ ) نكسوا على رؤوسهم يعني رجعوا للجهل اللى كانو فيه فإبراهيم عليه السلام زنقهم أكتر وقالهم يبقى ليه بتعبدوا ما لا ينفعكم ولا يضركم وحتى الآلهة دي مش قادرة تدافع عن نفسها ؟ (قَالَ أَفَتَعْبُدُونَ مِن دُونِ اللَّهِ مَا لَا يَنفَعُكُمْ شَيْئًا وَلَا يَضُرُّكُمْ)(أُفٍّ لَكُمْ وَلِمَا تَعْبُدُونَ مِنْ دُونِ اللَّهِ أَفَلَا تَعْقِلُونَ) هنا قوم إبراهيم عليه السلام لما لقوا نفسهم معندهمش أي كلام يردوا بيه راحوا مستخدمين مبدأ القوة قالوا إحنا هنحرقه وننصر آلهتنا.. "قَالُوا حَرِّقُوهُ وَانْصُرُوا آلِهَتَكُمْ إِنْ كُنْتُمْ فَاعِلِينَ" فحفروا خندق وقعدوا يجمعوا الخشب عشان يولعوا نار ، فجمعوا حطب كتير جدا ولما ولّعوا النار كانت النار كبيرة جدا لدرجة إنهم مكنوش عارفين يقربوا منها، فجابوا المنجنيق وهو آلة لرمي الحجارة حطوا فيه إبراهيم عليه السلام وقذفوه في النار، هنا قال إبراهيم عليه السلام :حسبي الله ونعم الوكيل حسبي الله يعني ربنا يكفيني ونعم الوكيل يعني لا أتوكل على أحد غيره، فربنا قال للنار : يا نار كوني بردا وسلاما على إبراهيم ولو كان قال بردا بس كان برد النار أضر بإبراهيم، لكنه قال برد وفي نفس الوقت سلام يعني لا تؤذيه... يكون في درجة حرارة مناسبة (قُلْنَا يَا نَارُ كُونِي بَرْدًا وَسَلَامًا عَلَىٰ إِبْرَاهِيمَ) ظل إبراهيم عليه السلام في النار لحد ما انطفت، وكانت كل الحيوانات بتحاول تطفي النار على إبراهيم حتى الضفدع إلا الوزغ (البُرص)، عشان كده رسول الله صلى الله عليه وسلم نهى عن قتل الضفدع وأمر بقتل الوزغ .. ¤ممكن حد يسأل طيب مش كده ظلم ؟ إيه ذنب إن ذرية البرص كلها تُقتل عشان واحد بس كان بينفخ في النار .. هو قتل الوزغ مش بس عشان كده، لكن يكون زي ما بنقتل الفواسق الخمسة 《الحية=العقرب=الفأرة=والكلب العقور=الحدأة <الحداية> 》 إللي رسول الله صلى الله عليه وسلم أمر إننا نقتلها حتى لو في الحرم، لأنه مؤذي وخبيث بطبعه وضار ويُفسد الطعام.. .. يُقال إنه سيدنا ابراهيم قعد في النار أربعين أو خمسين يوما وإن إبراهيم عليه السلام قال إن أفضل أيام عاشها كانت الأيام إللي كانت في النار،لكن مفيش دليل واضح على الكلام ده وكلها إجتهادات المفسرين .. بعد ما خرج إبراهيم عليه السلام من النار الناس اتصدمت!! طالع من النار سليم مفهوش أي خدش ،النار حتى مأحرقتش هدومه، الحاجة الوحيدة إللي النار حرقتها كان الحبل إللي كانوا مقيدين بيه إبراهيم عليه السلام، بعد ما قوم إبراهيم شافوا المعجزة دي قصادهم برضو لم يؤمنوا وفضلوا كفار زي ماهم.. واحد بس هو إللي آمن بإبراهيم عليه السلام وهو سيدنا لوط عليه السلام، وكان ابن أخو إبراهيم يعني إبراهيم يكون عم لوط عليهم الصلاة والسلام، إبراهيم عليه السلام يئس منهم هيعمل إيه أكتر من كده .. فقرر إنه يهاجر ويسيب أهله ووطنه عشان يروح مكان تاني يعبد فيه ربنا، سمع النمرود بقصة إبراهيم عليه السلام، ويقال انه قابله وعدى عليه وهو مهاجر والنمرود ده كان من الأربع ملوك إللي حكموا الأرض ، والملوك الأربعة دول اثنين مسلمين واثنين كفار، الإثنين المسلمين كانا ذو القرنين وسليمان عليه السلام، والإثنين الكفار كانا النمرود و بُخْتُنُصّر، وكان النمرود بيدّعي الربوبية يعني بيقول إنه رب.. ويقال انه كان حاكم للارض لمدة ٤٠٠ سنه فقعد يجادل إبراهيم وبيسأله هو مين ربك ده بقى؟ فقال إبراهيم عليه السلام ربي الذي يحيي ويميت.. فقال النمرود أنا أحيي وأميت! وجاب اتنين محكوم عليهم بالإعدام وقال أنا هعفو ده ويبقى كده أحييته وهقتل ده ويبقى كده أنا موته. فراح قايله بكل بساطة : خلاص أنا ربي بيطلع الشمس من المشرق فخليها إنت تطلع من المغرب .. فالنمرود اتصدم ومقدرش ينطق بكلمة! (أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ أَنْ آتَاهُ اللَّهُ الْمُلْكَ إِذْ قَالَ إِبْرَاهِيمُ رَبِّيَ الَّذِي يُحْيِي وَيُمِيتُ قَالَ أَنَا أُحْيِي وَأُمِيتُ ۖ قَالَ إِبْرَاهِيمُ فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ فَبُهِتَ الَّذِي كَفَرَ ۗ وَاللَّهُ لَا يَهْدِي الْقَوْمَ الظَّالِمِينَ) استمر النمرود في كفره وطغيانه ويقال ان الله ارسله بعثله ملوك عشان تدعوه للايمان بالله بس هو ابى وحارب الملوك دي فارسل الله عليه وعلى جيشه جيش من البعوض بقى ياكل فيهم ودخلت واحدة منها في منخري الملك فمكثت في منخريه أربعمائة سنة ، عذبه الله بها فكان يضرب رأسه بالمرازب في هذه المدة كلها حتى أهلكه الله بها ......................... نرجع لسيدنا ابراهيم اكمل إبراهيم هجرته ومعه زوجته السيدة سارة وخرج من أرض بابل هو ولوط عليه السلام وهاجروا إلى بلاد الشام،فضلوا هناك وبعدين حصل أزمة في بلاد الشام فاضطر إبراهيم عليه السلام إنه يسيب البلد وراح لمصر،وكان يحكمها ملك جبار وكلمة جبار بيقولوها على الشخص إللي قتل ناس كتير، فالملأ والحاشية بتاعته قالوا له إن في واحدة مشافوش في جمالها دخلت مصر.. وكانت سارة أجمل نساء العالمين بعد حواء.. فقال لهم يجبوها له، فلما راحوا عشان يجيبوا سارة قال لها إبراهيم إذا سألوكي عني قولي لهم إن أنا أخوكِ *أخوكي في الإسلام يعني*وكان الملك الجبار ده لو عرف إن المرأة ليها زوج كان يقتله، فإبراهيم عليه السلام دفع أقل الضررين، هو ضعيف !! وهم كده كده هياخدوا سارة!! فبدل ما ياخدوا سارة وهو كمان يُقتل !!لأ خلاهم ياخدوا سارة ويفضل هو على قيد الحياة يدعي ربنا ويطلب منه إنه ينجيهم وده من حكمته عليه السلام، وفعلا أخدوا سارة وقعد إبراهيم عليه السلام يصلي ويدعي ربنا...فلما أدخلوا سارة على الملك وحاول يقرب منها دعت ربنا وهو سمعها وهي بتتكلم ،فإيده اتشلت! فقالها إدعيلي إنها ترجع زي ما كانت وأنا مش هقرب منك، ففعلا دعت سارة ربنا. فرجعت إيده طبيعية، فحاول يقرب منها تاني فإيده اتشلت تاني فقالها ادعيلي فدعتله ورجعت طبيعية حصل الموضوع ده ثلاث مرات لحد ما في الآخر نادى على الخدم بتوعه قالوله خدوها من هنا إنتو جايبين لي شيطانة !! فسابها ترجع لإبراهيم عليه السلام وأعطاها السيده هاجر هدية، وهي كانت جاريه عند الملك ده فلما شافها إبراهيم عليه السلام قالها إيه إللي حصل ؟ قالت له ربنا نجاني منه وأعطاني هاجر، فخرج إبراهيم من مصر ومعه سارة وهاجر وراحوا لفلسطين .. إيه القصة إللي حصلت مع هاجر وسارة وإبراهيم عليهم السلام بعد ما راحوا فلسطين؟ ده إللي هنعرفه الجزء الجاي إن شاء الله..💚💚💚💚💚🌴

«قصص_الأنبياء» #الحلقة_الحادية_عشرة #قصة_إبراهيم(١) وُلد إبراهيم عليه السلام في بابل في العراق، وهو من نسل سام بن نوح عليه السلام، وكانت الأرض كلها على الكفر الناس نسيت ربنا والعلم اندثر ومع وسوسة الشيطان كل الناس كانوا كفار، وكان الناس في قرية إبراهيم عليه السلام برده مشركين، إللي فيهم بيعبد الأصنام وإللي فيهم بيعبد النجوم والكواكب وإللي فيهم بيعبد الملوك وفوق كل ده أبو إبراهيم عليه السلام نفسه كان بيصنع الأصنام ويبيعها للناس، يعني متربي في بيئة كلها كفر وكان أبوه اسمه آزر بيديله الأصنام عشان يروح يبيعها في السوق للناس، فكان إبراهيم عليه السلام يقعد ينادي في السوق : اشتروا من لا يسمع ولا يرى..اشتروا من لا يضر ولا ينفع.. وكان سنه صغير ومع ذلك كان بيفكر بعقله وكان ذكي وعنده حكمة ، فاتربى على كره الأصنام وكان بيتعجب من قومه إزاي الناس دي بتعبد ما لا يسمع لا يرى، ولا ينفع ولا يضر ؟ إزاي يكون حاجات إحنا إللي بنصنعها تكون هي إللي نعبدها؟ إبراهيم عليه السلام مستسلمش للواقع بتاعه، وقلد الناس تقليد أعمى ولا قال أنا لازم اكون زيهم وأمشي وراهم ..ربنا وهبه الهداية من صغره عن طريق إنه خلاه يفكر بعقله ، "وَلَقَدْ آتَيْنَا إِبْرَاهِيمَ رُشْدَهُ مِنْ قَبْلُ وَكُنَّا بِهِ عَالِمِينَ" فكان بيتفكر في خلق السماوات والأرض وفي خلق البشر لحد ماهتدى بتفكيره إن الكون ده له خالق، فكان عايز يعلم قومه ويهديهم لعبادة الله الخالق وإنهم يسيبوا عبادة الأصنام، ودي فطرة الإنسان إنه مجرد ما يعرف ربنا ويعرف دينه بيكون عايز ينشر الدين ده ويبدأ يبلغ الناس إللي حواليه،فبدأ إبراهيم عليه السلام بدعوة أبيه، لأن طبيعي إن أول شخص الإنسان يحب لهم الخير هم أبويه، لكن الموضوع كان صعب .. راح لأبوه وكلمه بكل لطف وحب واختار الكلمات بعناية واختار الأسلوب المناسب عشان يقدر يقنع أباه، قال له (إِذْ قَالَ لأبِيهِ يا أَبَتِ لِمَ تَعْبُدُ مَا لاَ يَسْمَعُ وَلاَ يَبْصِرُ وَلاَ يُغْنِى عَنكَ شَيْئاً) "يا أبتِ "عشان يحسسه إنه قريب منه ويستعطفه، إنت ليه بتعبد ما لا يسمع ولا يرى ومش بيفيدك بأي شيء،؟ هو الإنسان بيعبد إله ليه؟ مش عشان يستجيب دعاؤه ويدفع عن أي ضرر ويحميه ويرزقه ويدبر له أموره، طيب الأصنام مبتعملش أي حاجة من دي فإنت ليه بتعبدها؟ ☆وبعدها بقى بيكلمه بكل عقل (يا أَبَتِ إِنّي قَدْ جَاءنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطاً سَوِيّاً) (يا أَبَتِ لاَ تَعْبُدِ الشَّيْطَانَ إِنَّ الشَّيْطَانَ كَانَ لِلرَّحْمَنِ عَصِيّاً ) (يا أَبَتِ إِنّي أَخَافُ أَن يَمَسَّكَ عَذَابٌ مّنَ الرَّحْمَانِ فَتَكُونَ لِلشَّيْطَانِ وَلِيّاً .) يا أبتِ على الرغم من إنك أبويا والمفروض إنك أعلم مني، بس أنا جالي علم مش عندك فاسمع كلامي هوصلك للحق، يا أبتِ بلاش تسمع كلام الشيطان ده الشيطان عاصي للرحمن، يا أبتِ أنا خايف عليك من عذاب الرحمن كان إبراهيم عليه السلام بيكلم أبوه بكل حب و تواضع وإحترام، ومع ذلك رد أبوه بشدة وقسوة شديدة عليه، قاله :قَالَ أَرَاغِبٌ أَنتَ عَنْ ألِهَتِي يا إِبْراهِيمُ لَئِن لَّمْ تَنتَهِ لأرْجُمَنَّكَ وَاهْجُرْنِي مَلِيّاً) إنت مش عاجبك الآلهة إللي بعبدها يا إبراهيم، لو مبطلتش الكلام إللي بتقوله ده أنا هرجمك بالحجارة ، وأنا مش عايز أشوفك تاني أبدا.. وبالرغم من قساوة أبوه معاه رد عليه إبراهيم عليه السلام بكل حب ولين وشفقة ،(قَالَ سَلَامٌ عَلَيْكَ سَأَسْتَغْفِرُ لَكَ رَبِي إِنَّهُ كَانَ بِي حَفِيّاً) وفعلا استمر إبراهيم يستغفر لأبوه، لكن لما تبين إنه خلاص هيفضل كافر وإنه عدو لله تبرأ منه، لأن لا يجوز للمؤمن أن يدعو بالرحمة ولا يستغفر لكافر بالله حتى لو كان أبوه أو أخوه أو ابنه .. خرج إبراهيم من البيت وهو حزين إن أبوه مستجبش لعبادة الله وترك عبادة الأصنام، لكنه مفكرش أبدا إنه يترك الدعوة، قال لما أكلم الناس يمكن حد فيهم يهتدي، استخدم الأول أسلوب العقل عشان يقنعهم، بقى واقف بيكلم نفسه قصاد قومه عشان يخليهم يفكروا ويقنعهم بطريقة غير مباشرة .. فأول ما جيه الليل شاف نجم، فقال ده ربي وأنا هعبده.. (فَلما جنّ عليِه اللّيل رَأَى كَوْكبا قَال هذا ربّي فلّما أفَلَ قاَل لا أُحبّ الآفليِن) فلما اختفى قال الإله لازم يكون حاضر وميغبش، فشاف القمر طالع فقال (فَلَمَّا رَأَى الْقَمَرَ بَازِغًا قَالَ هَٰذَا رَبِّي ۖ فَلَمَّا أَفَلَ قَالَ لَئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ) يعني هو ده إلهي بقى فلما إختفى قال لو إلهي الحقيقي مهدانسش ي انا كده هضل وابقى من القوم الضالين فلما شاف الشمس بقى طالعة قال (فَلَمَّا رَأَى الشَّمْسَ بَازِغَةً قَالَ هَٰذَا رَبِّي هَٰذَا أَكْبَرُ ۖ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ ) هو دا ربي ده أكبر !! ومنور الدنيا وأعظم، فلما غابت الشمس قال أنا بريء من الآلهة دي كلها، أنا هؤمن باللي خلق الشمس والقمر والنجوم فقط ومش هعبد معاه أي حاجة تانية كل ده زي ماقولنا إبراهيم عليه السلام كان بيكلم نفسه قصاد قومه عشان يخليهم يفكروا ويقنعهم بطريقة غير مباشره .. بعد كده بدأ يكلم قومه ويسألهم :إيه التماثيل إللي إنتم قاعدين عليها طول النهار دي، ( إِذْ قَالَ لِأَبِيهِ وَقَوْمِهِ مَا هَٰذِهِ التَّمَاثِيلُ الَّتِي أَنتُمْ لَهَا عَاكِفُونَ) هم بيسمعوكم لما بتدعو؟( قال هل يسمعونكم اذ تدعون ) هل بينفعوكم بشيء ؟( او ينفعونكم او يضرون) الطبيعي والمنطقي إنهم يقولوا يا أه يا لأ، لكن دول قالوا : إحنا لقينا آباءنا بيعبدوها فعبدناهم .. (قَالُوا بَلْ وَجَدْنَا آبَاءَنَا كَذَٰلِكَ يَفْعَلُونَ ) فقال لهم إبراهيم عليه السلام إنتم وآباؤكم غلط آباؤكم ضلوا وإنتو كمان ضليتو لما مشيتوا وراهم وقلدتوهم ..(قَالَ لَقَدْ كُنتُمْ أَنتُمْ وَآبَاؤُكُمْ فِي ضَلَالٍ مُّبِينٍ) اعبدوا الله وحده هو إللي خلقكم ورزقكم وإللي إنتو بتعبدوهم دول لا يملكون أي شيء، فقالوا له : إنت بتتكلم جد فعلا ولا بتختلق كلام وبتهزر ؟ (قَالُوا أَجِئْتَنَا بِالْحَقِّ أَمْ أَنتَ مِنَ اللَّاعِبِينَ) فقال لهم : أنا بتكلم جد!! ربكم إللي خلق السموات والأرض وخلق النجوم والكواكب إللي إنتم بتعبدوها دي( قَالَ بَل رَّبُّكُمْ رَبُّ السَّمَاوَاتِ وَالْأَرْضِ الَّذِي فَطَرَهُنَّ وَأَنَا عَلَىٰ ذَٰلِكُم مِّنَ الشَّاهِدِينَ) واقسم ليكسر الاصنام بتاعتهم دي وبعض الناس سمعته وهو بيقول كدا ! وفعلا في يوم من الأيام كان عندهم زي عيد بيخرجوا فيه للصحراء، فانتهز إبراهيم عليه السلام الفرصة وقالهم انا مريض ومش هقدر أروح معاكم، (فقَال إنّي سَقِيِم). فمشيو وسابوه (فتولوا عنه مدبرين). وفعلا راح المعبد إللي فيه الآلهة ولقى قصادهم أصناف الأكل كلها وهي زي ماهي، قالهم باستهزاء: إنتو مش هتاكلوا؟ إيه مش بتنطقوا ليه؟ (فَرَاغَ إِلَىٰ آلِهَتِهِمْ فَقَالَ أَلَا تَأْكُلُونَ )(مَا لَكُمْ لَا تَنطِقُونَ) فراح نازل عليهم تكسير(فَرَاغ عليْهِم باليَميِن) لحد مكسرهم كلهم وخلاهم فتات ما عدا واحد بس وكان أكبر واحد فيهما ، علق الفأس على رقبته وسابه ومشي، (فَجَعَلَهُمْ جُذَاذًا إِلَّا كَبِيرًا لَّهُمْ لَعَلَّهُمْ إِلَيْهِ يَرْجِعُونَ) رجع الناس شافوا التماثيل متكسرة ! قالوا مين الظالم إللي عمل كده في آلهتنا ؟؟ (قَالُوا مَن فَعَلَ هَٰذَا بِآلِهَتِنَا إِنَّهُ لَمِنَ الظَّالِمِينَ) فالناس اللي سمعوه قالو إحنا سمعنا واحد بيهدد الآلهة بتاعتنا اسمه إبراهيم ..  (قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ )  (قَالُوا فَأْتُوا بِهِ عَلَىٰ أَعْيُنِ النَّاسِ لَعَلَّهُمْI يَشْهَدُونَ ) فقالوا هاتوه قصاد الناس كلهم عشان نشوف حكايته إيه وعمل كده ليه وهو ده بالضبط إللي كان عايزه إبراهيم عليه السلام.. ياترى إيه الحوار إللي هيحصل بين إبراهيم عليه السلام وقومه؟ وهل هيؤمنوا في الآخر ولا هيستكبروا زي الأقوام إللي سبقوهم؟ ده إللي هنعرفه في الحلقه الجاية إن شاء الله ..💚💚💚💚💚🌴

«قصص_الأنبياء» #الحلقة_العاشرة #قصة_صالح شوفنا إزاي إن عاد قوم هود عليه السلام كذبوه ورفضوا عبادة ربنا فأهلكهم الله بالريح ونجّى هود والذين آمنوا معه، عاش هود عليه السلام والذين آمنوا معه على عبادة الله، وتناسلوا وجه جيل ورا جيل ، والشيطان لعب لعبته تاني * نعمل تماثيل عشان نفتكر بيها آباءنا وأجدادنا وفي الآخر الأحفاد يعبدوها* عبَد الناس الأصنام تاني وهم من نسل هود عليه السلام واسمهم ثمود، ثمود سكنوا منطقة اسمها الحِجْر ويُقال إنها في شمال شرق المدينة المنورة، وقوم ثمود لأنهم أحفاد هود عليه السلام إللي هو من قبيلة عاد أصلا كانوا أقوياء زيهم، وكانوا بينحتوا الجبال على هيئة بيوت، يعني الجبل الضخم الكبير ده كانوا بينحتوا فيه وبيحولوه لبيت يسكنوا فيه مش بيبنوه من الطوب والأسمنت وده طبعا بيدل على قوتهم وضخامة أجسامهم.. (وَثَمُودَ الَّذِينَ جَابُوا الصَّخْرَ بِالْوَادِ ) اي ثمود الذين خرقوا الصخر ودخلوه فاتخذوه بيوتا.. واحنا قولنا قبل كدا ان ربنا لا يُعذب أحد إلا لما يبعتله رسول ...أرسل لهم واحد منهم اسمه صالح، وزي ما قلنا بردو قبل كده إن ربنا بيرسل لهم واحد منهم عارفين أصله ونسبه وعارفين صدقه عشان ميكنش ليهم حجة.. صالح عليه السلام بدأ يدعو قومه لعبادة الله وإنهم يسيبوا عبادة الأصنام، "وإِلى ثمودَ أخَاهُم صَالحاً قال ياقومِ اعبُدُوا اللهَ مالكُم من إلهٍ غيره" وبدأ يذكرهم بنعم ربنا عليهم وإزاي إن ربنا أسكنهم الأرض بعد قوم عاد وإزاي إن ربنا أعطاهم القوة إنهم يبنوا بيوتهم من الجبال "واذْكُرُوا إذ جعلكم خلفاء من بعد عاد وبَوّأَكُم في الأرض تَتّخِذُون من سهُولِها قصورًا وتنحتُون من الجبالِ بيوتا" فهو ده بقى شكر النعمة؟! ربنا يعطيكم الثمار والزروع والأموال وفي الآخر تعبدوا غيره ومتسمعوش كلامه فقالهم إنهم يستغفروا ربنا ويتوبوا وربنا هيقبل توبتهم.. (وَإِلَى ثَمُودَ أَخَاهُمْ صَالِحًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ هُوَ أَنْشَأَكُمْ مِنَ الْأَرْضِ وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا إِلَيْهِ إِنَّ رَبِّي قَرِيبٌ مُجِيبٌ) ردوا بقى قالوا إيه؟ قالوا له إنت إيه إللي جرالك .. إنت كنت كويس !! إنت أكيد مسحور ،(قَالُوا إِنَّمَا أَنْتَ مِنَ الْمُسَحَّرِينَ) إحنا كنا حاطين أملنا عليك إحنا كنا متوقعين إنك هيكون ليك شأن كبير في القبيلة بسبب حكمتك وأخلاقك وحلمك !! إنت إزاي بتنهانا إننا نعبد الآلهة إللي طول عمرنا بنعبدها إحنا وآبائنا ؟ كلامك ده مش صح .. (قَالُوا يَا صَالِحُ قَدْ كُنْتَ فِينَا مَرْجُوًّا قَبْلَ هَذَا أَتَنْهَانَا أَنْ نَعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ مُرِيبٍ) فقالهم بكل لطف ولين وكلام كله عقل: طيب لو أنا طلع كلامي صح ، عذركم إيه عند ربنا ساعتها؟ مين إللي هينجيكم منه ؟ وكمان مش عايزيني أدعوكم لعبادته ؟ طيب إزاي وربنا هو إللي أمرني بكده .. ولو أنا سمعت كلامكم مين هينجيني من غضب ربنا (قَالَ يَا قَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي مِنْهُ رَحْمَةً فَمَنْ يَنْصُرُنِي مِنَ اللَّهِ إِنْ عَصَيْتُهُ فَمَا تَزِيدُونَنِي غَيْرَ تَخْسِيرٍ) قالوا له إنت بشر زينا ! ازاي عايزنا نؤمن ونتبع بشر ؟ ثم إشمعنا أنت يعني إللي جالك وحي دونا عن باقي القبيلة ده إنت كذاب.. "قالوا أبشرا منا واحدا نتبعه إنا إذا لفي ضلال وسُعُر" كان آمن مع صالح بعض المستضعفين فكان أكابر القوم والأغنياء بيقولوا لهم إنتم متأكدين إن صالح ده مرسل من ربه فبدل ما الذين آمنوا يقولوا ايوة احنا متأكدين قالوا لهم إحنا مش بس متأكدين إحنا مؤمنين كل الإيمان باللي صالح بيقوله.. فقال لهم الملأ اللي استكبروا إحنا بقى مش مؤمنين بأي حاجة من الكلام ده. (قَالَ ٱلْمَلَأُ ٱلَّذِينَ ٱسْتَكْبَرُواْ مِن قَوْمِهِۦ لِلَّذِينَ ٱسْتُضْعِفُواْ لِمَنْ ءَامَنَ مِنْهُمْ أَتَعْلَمُونَ أَنَّ صَٰلِحًا مُّرْسَلٌ مِّن رَّبِّهِۦ ۚ قَالُوٓاْ إِنَّا بِمَآ أُرْسِلَ بِهِۦ مُؤْمِنُونَ)( قال اللذين استكبروا انا باللذي امنتم به كافرون ) ¤طيب اشمعنى الفقراء والمستضعفين بيؤمنوا وهم دول أتباع الأنبياء دايما والملأ من الأكابر والأغنياء هم إللي بيرفضوا دعوة الأنبياء؟ لأن المستضعفين دول متعودين إن حد يأمرهم فبالنسبة لهم لما يكون في إله هو إللي يأمرهم أحسن طبعا من بشر يتكبر عليهم، لكن الأغنياء متعودين إن هم إللي يعطوا الأوامر ومفيش حد يعطيهم أي أمر ، فالموضوع بيكون تقيل على نفسهم أوي، إزاي يعني حد يتحكم فيّا ويقولي اعمل ومتعملش وهو ده الكبر اللي كاز اول معصيه لله سبحانه وتعالل من ابليس.. صالح عليه السلام استمر في دعوة قومه ثمود، ففي مرة راح لهم في مكان بيجتمعوا فيه زي نادي كده، وقعد يدعوهم ، فقالوا له إيه بقى؟ قالوا يا صالح لو إنت عايزنا نؤمن بيك هاتلنا دليل إن إنت فعلا رسول.. (مَا أَنْتَ إِلَّا بَشَرٌ مِثْلُنَا فَأْتِ بِآيَةٍ إِنْ كُنْتَ مِنَ الصَّادِقِينَ) شايف الصخرة العظيمة إللي هناك دي ! لو إنت طلعت لنا منها ناقة هنؤمن بيك.. بس استنى مش أي ناقة كده وخلاص، إحنا عايزنها تكون كبيرة وعظيمة لدرجة إنها تشرب يوم كامل لوحدها وإحنا يوم، وعايزينها تكون حامل وفي الشهر العاشر، وعايزين...وعايزين...وقعدوا يشددوا في الوصف عشان يعجزوه يعني.. فصالح عليه السلام قالهم لو أنا عملتلكم إللي إنتم قلتوا عليه ده هتؤمنوا ؟ قالوا نعم وأعطوه العهود والمواثيق لانهم فاكرين إنه مش هيقدر فعادي يعني نقوله كلمتين وخلاص فصالح عليه السلام صلى ودعا ربنا إنه يحقق لهم إللي طلبوه، وفعلا الصخرة انشقت عن ناقة عظيمة بنفس الوصف إللي طلبوه بالضبط.. أهه إللي طلبتوه جالكم بالضبط إيه النظام ؟ برضو لم يؤمنوا "وآتَيْنا ثمودَ الناقةَ مبصرةً فظلمُوا بها" صالح عليه السلام قالهم دي ناقة ربنا هو إللي خلقها بدون أب أو أم محدش يقرب منها ولا يؤذيها سيبوها ترعى في أرض الله،لو أذيتوها ربنا هيرسل عليكم عذاب شديد.. (...قَدْ جَاءَتْكُمْ بَيِّنَةٌ مِنْ رَبِّكُمْ هَذِهِ نَاقَةُ اللَّهِ لَكُمْ آيَةً فَذَرُوهَا تَأْكُلْ فِي أَرْضِ اللَّهِ وَلَا تَمَسُّوهَا بِسُوءٍ فَيَأْخُذَكُمْ عَذَابٌ أَلِيمٌ) وقالهم الناقة تشرب الماء يوم كامل وانتو تشربوا الماء اليوم التاني وهكذا، (قَالَ هَذِهِ نَاقَةٌ لَهَا شِرْبٌ وَلَكُمْ شِرْبُ يَوْمٍ مَعْلُومٍ)الشعراء (وَنَبِّئْهُمْ أَنَّ الْمَاءَ قِسْمَةٌ بَيْنَهُمْ كُلُّ شِرْبٍ مُحْتَضَرٌ)القمر وكان من معجزات الناقة انها كانت تشرب المياه في يوم وكانت تترك المياه للبشر والحيوانات في يوم آخر وكانت تدر حليباً يكفي آلاف الرجال والنساء والأطفال .. وكان أي حاجة وحشة تحصل لقوم صالح يقعدوا يقولوا لصالح والذين آمنوا معه إنتول السبب في إللي بيحصلنا، خربتوا البلد لولا إنتم كان زمانا في وضع أحسن .. بيتشائموا بيهم يعني "قالوا اطَّيَّرنا بك وبمن معك" صالح قال لهم يعني مش بسبب كفركم وعنادكم ومعاصيكم بيحصل لكم الإبتلاءات ؟ "قال طائرُكم عند الله بل أنتم قومٌ تُفْتَنون" استمر الوضع كده فترة ، وبعدين الملأ اجتمعوا مع بعض قالوا الناقة بتشرب المية بتاعتنا الوضع كده مش نافع ، لازم نشوف حل.. خلونا نقتلها ونخلص منها ونرجع ناخد المية بتاعتنا فرئيسهم هو إللي تولى مهمة قتل الناقة ويقال إن اسمه "قُدَار بن سالف" وكان في إمرأتين كافرتين في القرية واحدة منهم كانت زوجة لواحد من إللي أسلموا وهي كانت كافرة فسابها، فقالت لواحد من أبناء عمها إنها هتتزوجه لو قتل الناقة، وكانت غنية وذات حسب، والتانية كانت عجوز وكانت زوجة لأحد الرؤساء وكان عندها أربع بنات فعرضت على قُدار بن سالف إنه لو قتل الناقة هتزوجه أي واحدة يختارها من بناتها. *وده كلام علماء التفسير وموجود في تفسير ابن كثير وافق قُدار واجتمع مع ابن عم المرأة الأولى وكمان جابوا سبعة تانيين بقى المجموع تسع أشخاص ربنا قال عنهم : (وكان في المدينة تسعةُ رهطٍ يُفسدون في الأرضِ ولا يُصلحون)وقالوا للناس إحنا مش هنقتل الناقة غير لما توافقوا، وقعدوا يقنعوهم وفعلا الناس وافقت إن التسع أشخاص دول يقتلوا ناقة صالح، الناقة كانت بتنزل من الجبل عشان تشرب المية فاستنوها وهي نازلة فهجم عليها قدار فعقرها يعني ضربها على رجلها فكسرها ،فوقعت الناقة على الأرض وصاحت بصوت عالي جدا، فقتلها قُدار وإللي معاه (إذِ انْبَعَث أشقاها فقال لهم رسول الله ناقةَ الله وسُقياها" فكذبوه فعقروها") الشمس (فَعَقَرُوا النَّاقَةَ وَعَتَوْا عَنْ أَمْرِ رَبِّهِمْ )الاعراف ومش كده وبس ده قالوا إحنا نقتل صالح كمان ونخلص من القصة دي كلها مرة واحدة، ولو حد سألنا هنقوله إحنا منعرفش حاجة .. ("لنبيتنه وأهله ثم لنقولن لوليه ما شهدنا مَهلك أهله") فربنا أوحى لصالح عليه السلام إنه يخرج من القرية لأن ربنا هيرسل عليهم العذاب، (فَلَمَّا جَاءَ أَمْرُنَا نَجَّيْنَا صَالِحًا وَالَّذِينَ آمَنُوا مَعَهُ بِرَحْمَةٍ مِنَّا وَمِنْ خِزْيِ يَوْمِئِذٍ إِنَّ رَبَّكَ هُوَ الْقَوِيُّ الْعَزِيزُ) قال لهم صالح عليه السلام إنتوا قتلتوا الناقة ربنا هيبعت عليكم العذاب بعد ثلاثة أيام (فقعروها فقَالَ تمتّعُوا في دَارِكُم ثلاثةَ ايّام ذَلك وَعدٌ غيرُ مكذُوب) وبرضو مكنوش مصددقين وقالوله (ائتنا بما تعدنا ان كنت من الصادقين ).. ربنا ارسل حجاره من السماء الاول قتلت ال ٩ اشخاص اللي عقروا الناقه قبل باقي القوم صالح .. الباقي بقى صحيوا أول يوم من أيام الإنذار لقوا كلهم وشهم أصفر،وصحيوا تاني يوم لقوا وشهم لونه أحمر، واليوم الثالث لقوا وشهم لونه اسود، وبرضو مكنوش بيتوبوا ! فلما عدى اليوم الثالث وصحيوا الصبح اتحنطوا وفضلوا قاعدين مستنيين العذاب إللي هيجلهم لما الشمس طلعت سمعوا صيحة عالية جدا جاتلهم من السماء ، والأرض اهتزت من تحتهم بشدة وانخلعت قلوبهم من الرعب وماتوا على حالهم..... (وَأَخَذَ الَّذِينَ ظَلَمُوا الصَّيْحَةُ فَأَصْبَحُوا فِي دِيَارِهِمْ جَاثِمِينَ) يعني بقوا جثث هامده ومتجمده في مساكنهم الفارهه الفخمه اللي منفعتهمش بحاجه.. رجع صالح عليه السلام عشان يشوف حصلهم إيه، وبعد ما شافهم إداهم ظهره وقالهم وهو ماشي ، شوفتوا أنا بلغتكم رسالة ربنا وإنتوا مسمعتوش كلامي (فَتَوَلَّى عَنْهُمْ وَقَالَ يَا قَوْمِ لَقَدْ أَبْلَغْتُكُمْ رِسَالَةَ رَبِّي وَنَصَحْتُ لَكُمْ وَلَكِنْ لَا تُحِبُّونَ النَّاصِحِينَ) يقال ان سيدنا صالح انتقل الى حرم الله في مكة وظل هناك حتى مات. المرة الجاية هيكون كلامنا عن خليل الله إبراهيم عليه السلام💚💚💚💚💚🌴

«قصص_الأنبياء » #الحلقة_التاسعة #قصة_هود بعد موت نوح عليه السلام عاش أبناؤه على التوحيد وعَمَروا الأرض، وبعد سنين وسنين الناس نسيت وصية نوح عليه السلام و بدأ الشيطان يوسوس لهم تاني بنفس الطريقة ، أحفاد نوح عليه السلام قالوا إحنا مش عايزين ننسى آبائنا فاحنا نعملهم تماثيل،عشان نفضل فاكرينهم فيذكرونا بعبادة ربنا وقدرة ربنا والمعجزة إللي حصلت لنوح عليه السلام..وطبعا جيل بعد جيل نسيوا عبادة ربنا ورجعوا يعبدوا الأصنام تاني وإحنا قلنا إن الشيطان نفسه طويل مبيزهقش، عادي جدا بالنسبة له إن يحط بذرة النهاردة بخطوة ويلاقي ثمرتها بعد جيل كامل... ¤ ممكن حد يسأل ويقول وهم ذنبهم إيه.. ماهم مكنوش يعرفوا حاجة؟ يبقى في حاجتين يا اما تقصير من الأباء في نقل العلم لأبناؤهم وإنهم يحذروهم من الشرك ! طيب خلونا نقول إن الأباء مقصروش في تربية أبناؤهم والأبناء هم إللي ضلوا وعبدوا الأصنام، لأنهم مش مستوعبين خطورة الشرك بالله وطال عليهم العهد بعد هلاك قوم نوح عليه السلام، وأكيد إللي سمع مش زي إللي شاف طيب إيه الحل ؟ الحل إن ربنا يبعت لهم نذير وهو ده إللي حصل مع عاد قوم هود.. عاد قوم هود هم أول ناس عبدوا الأصنام على وجه الأرض بعد الطوفان، كانوا بيسكنوا في مكان اسمه الأحقاف وهي جبال الرمل ، وهي جزء من صحراء الربع الخالي، بين سلطنة عُمان واليمن، "واذْكُر أخَا عادٍ إذ أنذَرَ قومَه بالأحْقَاف " وكانوا عمالقة وأقوياء مكنش في حد في قوتهم أبدا في الوقت ده، بنوا مدينتهم اسمها إرم وكانوا بيحبوا يعيشوا في الخيام، فبنوا خيام بعواميد عملاقة ومرتفعة جدا ،وكان عندهم حضارة متقدمة، ربنا وصف حضارتهم بإنها لم يُخلق مثلها في البلاد، ويُقال إن أسوار المدينة كانت من الذهب والفضة، (ألم ترى كيف فعل ربك بعاد )(إرم ذات العماد، )(التي لم يخلق مثلها في البلاد) وكانوا بيبنوا فوق الجبال القصور للترفيه، بيلعبوا يعني يعني مش عشان يسكنوا فيها ، لأ بيبنوها كده وخلاص، من كتر ماكانوا أقوياء وعندهم رخاء وأموال ،وكانت القصور دي آية في الروعة.. "أتَبْنُونَ بكل رِيعٍ آيةً تَعبثُون" "وتتخذون مصانع لعلكم تخلدون" وكان الناس بيخافوا من قوم عاد لأنهم كانوا ظلمة وجبارين، مكنش في حد بيقف في طريقهم، فهم اجتمع عندهم الكفر والظلم "وَإِذَا بَطَشْتُمْ بَطَشْتُمْ جَبَّارِينَ" ربنا كان قادر على إنه يهلكهم في لحظة لكنه سبحانه قال: "وما كنا مُعَذّبِينَ حتّى نَبْعثَ رَسُولا" فعشان يقيم عليهم الحُجة أرسل إليهم هود عليه السلام عشان يحذرهم من عبادة الأصنام ويدعوهم لعبادة الله وحده كان هود عليه السلام واحد منهم يعني عارفينه وعارفين أخلاقه وعارفين أصله وكل حاجة عنه، (وَإِلَى عَادٍ أَخَاهُمْ هُودًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ إِنْ أَنْتُمْ إِلَّا مُفْتَرُونَ) وكان هود عليه السلام من الأنبياء العرب الأربع ، وهم عالسريع كده: هود وصالح وشعيب ومحمد صلى الله عليهم أجمعين. فكان هود عليه السلام وقومه عاد يتكلمون العربية.. قال هود لقومه اعبدوا الله وسيبكم من عبادة الأصنام ربنا هو إللي خلقكم وأعطاكم القوة والأموال ، وأنعم عليكم بالرخاء إللي إنتم عايشين فيه ده، الأصنام حجارة لا تضر ولا تنفع فَاتَّقُوا اللَّهَ وَأَطِيعُونِ {131} وَاتَّقُوا الَّذِي أَمَدَّكُم بِمَا تَعْلَمُونَ {132} أَمَدَّكُم بِأَنْعَامٍ وَبَنِينَ {133}وَجَنَّاتٍ وَعُيُونٍ {134} إِنِّي أَخَافُ عَلَيْكُمْ عَذَابَ يَوْمٍ عَظِيمٍ {135} ردوا عليه قالوا إيه؟؟ قال عِليٍة القوم والأكابر منهم : إنت سفيه وكذاب ! (قَالَ الْمَلَأُ الَّذِينَ كَفَرُوا مِنْ قَوْمِهِ إِنَّا لَنَرَاكَ فِي سَفَاهَةٍ وَإِنَّا لَنَظُنُّكَ مِنَ الْكَاذِبِينَ) فرد عليهم هود عليه السلام وقال : أنا مش سفيه ولا حاجه انا رسول من عند ربنا، أمرني إني أبلغكم الكلام ده، وأنا بنصحكم إنكم تسمعوا الكلام (قَالَ يَا قَوْمِ لَيْسَ بِي سَفَاهَةٌ وَلَكِنِّي رَسُولٌ مِنْ رَبِّ الْعَالَمِينَ) (أُبَلِّغُكُمْ رِسَالَاتِ رَبِّي وَأَنَا لَكُمْ نَاصِحٌ أَمِينٌ) قالوا أنت جاي تقولنا نعبد الله وحده بس كده ونسيب الآلهة إللي كانوا آباءنا بيعبدوها إنت أكيد اتجننت إنت فاكر إننا هنسيب عبادة الأصنام مجرد ما تقولنا طبعا مش هنؤمن بكلامك! واضح إن الآلهة بتاعتنا آذتك لأنك بتتكلم عنها كده (قَالُوا أَجِئْتَنَا لِنَعْبُدَ اللَّهَ وَحْدَهُ وَنَذَرَ مَا كَانَ يَعْبُدُ آبَاؤُنَا فَأْتِنَا بِمَا تَعِدُنَا إِنْ كُنْتَ مِنَ الصَّادِقِينَ) سورة الاعراف ( إِنْ نَقُولُ إِلَّا اعْتَرَاكَ بَعْضُ آلِهَتِنَا بِسُوءٍ قَالَ إِنِّي أُشْهِدُ اللَّهَ وَاشْهَدُوا أَنِّي بَرِيءٌ مِمَّا تُشْرِكُونَ ) سورة هود قال لهم هود : استغفروا ربنا من أفعالكم وهو هيغفر لكم وينزل عليكم الأمطار ويزيدكم قوة للقوة إللي عندكم، بلاش تُعرضوا عن عبادة ربنا ، (وَيَا قَوْمِ اسْتَغْفِرُوا رَبَّكُمْ ثُمَّ تُوبُوا إِلَيْهِ يُرْسِلِ السَّمَاءَ عَلَيْكُمْ مِدْرَارًا وَيَزِدْكُمْ قُوَّةً إِلَى قُوَّتِكُمْ وَلَا تَتَوَلَّوْا مُجْرِمِينَ) ثم انتم بتجادلوني في حاجة اخترعتوها أنتم وآباؤكم ما أنزل الله بها من سلطان ( أَتُجَادِلُونَنِي فِي أَسْمَاءٍ سَمَّيْتُمُوهَا أَنْتُمْ وَآبَاؤُكُمْ مَا نَزَّلَ اللَّهُ بِهَا مِنْ سُلْطَانٍ) فقالوا إنت بشر زيك زينا.. بتاكل من إللي بناكل منه.. وبتشرب من إللي بنشرب من انت بس عايز يكون لك ملك وسلطة علينا فقال لهم هود : إنتم ليه مستغربين إن ربنا يبعث لكم واحد منكم عشان ينصحكم ويَدُلكم على الصح وأنا مش عايز منكم حاجة لا عايز مال ولا عايز سلطة، (يَا قَوْمِ لَا أَسْأَلُكُمْ عَلَيْهِ أَجْرًا إِنْ أَجْرِيَ إِلَّا عَلَى الَّذِي فَطَرَنِي أَفَلَا تَعْقِلُون) أنا عايزكم تؤمنوا بربنا بس افتكروا إن ربنا استخلفكم في لأرض بعد هلاك قوم نوح وأعطاكم قوة كبيرة، ولو آمنتم بالله هيزود لكم القوة دي وينعم عليكم بنعم أكتر (أَوَعَجِبْتُمْ أَنْ جَاءَكُمْ ذِكْرٌ مِنْ رَبِّكُمْ عَلَى رَجُلٍ مِنْكُمْ لِيُنْذِرَكُمْ وَاذْكُرُوا إِذْ جَعَلَكُمْ خُلَفَاءَ مِنْ بَعْدِ قَوْمِ نُوحٍ وَزَادَكُمْ فِي الْخَلْقِ بَسْطَةً فَاذْكُرُوا آلَاءَ اللَّهِ لَعَلَّكُمْ تُفْلِحُونَ) قالوا لبعض: بصوا لو سمعتوا كلام بشر زيكم هتضلوا وتكونوا خاسرين ده بيقول إننا لو متنا وخلاص اتحولنا لعظام وتراب هنصحى تاني ونتحاسب ده بيفتري الكذب مش فاهم إن إحنا مش هنعيش إلا مرة واحدة بس قوم هود قالوا : خلااااص سواء نصحتنا ولا لأ إحنا مش هنؤمن بيك ومش هنتعذب كمان .. (قَالُوا سَوَاءٌ عَلَيْنَا أَوَعَظْتَ أَمْ لَمْ تَكُنْ مِنَ الْوَاعِظِينَ)(إنْ هَذَا إِلَّا خُلُقُ الْأَوَّلِينَ )(وَمَا نَحْنُ بِمُعَذَّبِينَ) ثم مفيش حد أكثر منا قوة أصلا عشان يعطينا قوة زيادة (فَأَمَّا عَادٌ فَاسْتَكْبَرُوا فِي الْأَرْضِ بِغَيْرِ الْحَقِّ وَقَالُوا مَنْ أَشَدُّ مِنَّا قُوَّةً أَوَلَمْ يَرَوْا أَنَّ اللَّهَ الَّذِي خَلَقَهُمْ هُوَ أَشَدُّ مِنْهُمْ قُوَّةً وَكَانُوا بِآيَاتِنَا يَجْحَدُونَ) وبعدين إنت عمال تقولنا اعبدوا ربنا ...اعبدوا ربنا هو إيه الدليل أصلا على كلامك؟ فهود عليه السلام تحداهم قالهم : كلكم اجتمعوا وأتحداكم لو قدرتم ببطشكم وقوتكم إنكم تؤذوني وفعلا محدش قدر يقرب منه بس برضو ما صدقوش فقال لهم هود :أنا عملت إللي عليّا وبلغتكم رسالة ربنا ، وعادي جدا إن ربنا يستبدلكم ويجيب ناس غيركم يعبدوه انتم لن تضروا الله شيئا فهو الغني عن العالمين، ربنا لا يحتاج لعبادتكم إنتم إللي محتاجينها ربنا هيبعت عليكم العذاب قريب اوي وساعتها هتندموا لأنكم مسمعتوش الكلام . (فَإِنْ تَوَلَّوْا فَقَدْ أَبْلَغْتُكُمْ مَا أُرْسِلْتُ بِهِ إِلَيْكُمْ وَيَسْتَخْلِفُ رَبِّي قَوْمًا غَيْرَكُمْ وَلَا تَضُرُّونَهُ شَيْئًا إِنَّ رَبِّي عَلَى كُلِّ شَيْءٍ حَفِيظٌ) ربنا منع المطر عن قوم هود وبدأ القحط فكانوا بيدعوا الأصنام فشافوا غيم أسود من بعيد ففرحوا إن خلاص هينزل عليهم المطر، ولكن السحاب كان مليان بالريح الشديدة المُهلكة، من شدتها كانت تحمل الشخص وترفعه عالي جدا وتنزله في الأرض تنفصل رأسه عن جسده واستمرت الريح لمدة ثمانية أيام،لحد ما هلكت عاد واندثرت تحت الرمال ومنفعهمش قوتهم ولا نفعتهم حضارتهم .. (وَأَمَّا عَادٌ فَأُهْلِكُوا بِرِيحٍ صَرْصَرٍ عَاتِيَةٍ)(سَخَّرَهَا عَلَيْهِمْ سَبْعَ لَيَالٍ وَثَمَانِيَةَ أَيَّامٍ حُسُومًا فَتَرَى الْقَوْمَ فِيهَا صَرْعَىٰ كَأَنَّهُمْ أَعْجَازُ نَخْلٍ خَاوِيَةٍ)(فَهَلْ تَرَىٰ لَهُم مِّن بَاقِيَةٍ ) ؟!! كان هود عليه السلام مع الذين آمنوا معه وسط العذاب ده كله مفيش أي حاجة بتصيبهم، ربنا نجاهم ومحصلهمش اي حاجه (وَلَمَّا جَاءَ أَمْرُنَا نَجَّيْنَا هُودًا وَالَّذِينَ آمَنُوا مَعَهُ بِرَحْمَةٍ مِنَّا وَنَجَّيْنَاهُمْ مِنْ عَذَابٍ غَلِيظٍ) هل ياترى الناس اتعظت ومكررتش نفس خطأ عاد؟ ولا استكبروا وعبدوا الأصنام تاني؟ ده اللي هنعرفه المرة الجاية ان شاء الله ..💚💚💚💚💚🌴

«قصص_الأنبياء» #الحلقة_الثامنة #قصة_نوح(٣) آخر حاجة قلناها المرة إللي فاتت إن نوح عليه السلام ركب السفينة هو والذين آمنوا معاه ومعاهم من كل نوع من الحيوانات ذكر وأنثى،وربنا أغرق الأرض بالماء وأهْلَك قوم نوح عليه السلام، (فَأَنجَيْنَاهُ وَمَن مَّعَهُ فِي الْفُلْكِ الْمَشْحُونِ) (ثُمَّ أَغْرَقْنَا بَعْدُ الْبَاقِينَ) ربنا وَعد نوح عليه السلام إنه ينجّيه هو وأهله،والمقصود بالأهل هنا هو كل من آمن بالله سواء كانوا أقاربه ولا لأ، بس زوجته كانت كافرة وكانت بتقول عنه مجنون، وطبعا باعتبار الزوجة هي أكتر واحدة عارفة خبايا زوجها فده أثر على دعوة نوح عليه السلام، وهنا ربنا سماها خائنة في القرآن لأن الأصل إن الزوجة تعين زوجها في الشدائد وتعينه على الحق،وطبعا مش المقصود الخيانة الزوجية إطلاقا إللي هي الزنا لأن ربنا حافظ لأعراض الأنبياء.. وهي ماتت على الكفر في الآخر مع الكفار، (ضَرَبَ اللَّهُ مَثَلًا لِّلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ) ونوح عليه السلام كان لأربعة أبناء ثلاثة آمنوا و الرابع لم يؤمن برسالة نوح عليه السلام هو كمان لحد آخر لحظة ومرضاش يركب في السفينة، وهنا لما الموج فصل بين الأب وابنه ..نوح عليه السلام بمشاعر الأب بدأ يسأل ربنا ، يارب مش إنت قلتلي إنك هتنجيلي أهلي ..طيب ما ابني من أهلي وإنت وعدك الحق لا تخلف وعدا وعدته (وَنَادَىٰ نُوحٌ رَّبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ) هنا ربنا قال لنوح عليه السلام وقالنا كلنا القاعدة دي: إنه ليس من أهلك.. أي حد مش على دينك مينفعش يكون بينك وبينه أي صلة وُد وحب حتى لو كان ابنك من لحمك ودمك، يعني العبرة بقرابة الدين مش قرابة النسب، فربنا قال لنوح إن يتبرأ من ابنه لأنه مش على دينه فبالتالي هو مش من أهلك.. وأنا وعدتك إني هنجيلك أهل المؤمنين لكن الكفار لأ، فلا تدعوني بشيء محرم وهو إني أُنْجي كافر، وأنا أرفعك إنك تكون من الجاهلين إللي مش عارفين الكلام ده، (قَالَ يَا نُوحُ إِنَّهُ لَيْسَ مِنْ أَهْلِكَ ۖ إِنَّهُ عَمَلٌ غَيْرُ صَالِحٍ ۖ فَلَا تَسْأَلْنِ مَا لَيْسَ لَكَ بِهِ عِلْمٌ ۖ إِنِّي أَعِظُكَ أَن تَكُونَ مِنَ الْجَاهِلِينَ) ورسول الله صلى الله عليه وسلم بيقولنا :"يُستجاب لأحدكم ما لم يدعُ بإثم أو قطيعة رحم...إلخ"يعني مينفعش ندعي بحاجة محرمة، فهنا نوح عليه السلام استعاذ بالله إنه يقع في خطأ يشترك فيه مع الناس الجهلة وخصوصا إنه نبي عنده من العلم إللي مش عند غيره، ودعا ربنا إنه يغفرله. (قَالَ رَبِّ إِنِّي أَعُوذُ بِكَ أَنْ أَسْأَلَكَ مَا لَيْسَ لِي بِهِ عِلْمٌ ۖ وَإِلَّا تَغْفِرْ لِي وَتَرْحَمْنِي أَكُن مِّنَ الْخَاسِرِينَ) كانت السفينة بتتحرك وسط أمواج عالية جدا 🌊 حتى إن ربنا شبه الأمواج دي بالجبال ⛰ من كتر ما هي عالية وعظيمة،وإللي شاف منكم فيديوهات عن سفن بتمشي في البحر وسط موج عالي هيحس وهيفهم المعنى ده أوي، المنظر مرعب بعد ما ربنا أهلك قوم نوح عليه السلام ..أمر السماء إنها توقف المطر وأمر الأرض إنها تبلع الماء، ورسيت السفينة على جبل الجودي، وربنا تركها لينا آية. "وقيل يا أرض ابلعي ماءكِ وياسماء أقلعي وغيض الماء وقُضِي الأمر واستوت على الجُودِي" وفي هنا إعجاز علمي قاله دكتور زغلول النجار، قال إن في مستكشفين كفار ادعوا إن الطوفان إللي حصل كان بسبب زلازال حصل في قاع البحر فأدى إلى فيضان من ماء البحر ..تسونامي يعني.فأغرق الأرض،وده عكس إلي جه في القرآن ، لأن ماء المطر عذب وعيون الماء إللي تفجرت من الأرض عذبة، فلما اكتشفوا سفينة نوح في أعلى قمة جبل الجودي متغطية بكيمة كبيرة من رسوبيات الماء العذب اثبت صحة كلام القرآن وكذب كلام المستكشفين، فالحمد لله على نعمة الإسلام... بعد ما الأرض نشفت وبقت ينفع يستقروا فيها ربنا أمر نوح عليه السلام إنه ينزل من السفينة، عشان يبدأ فيها حياة جديدة.. (قِيلَ يَا نُوحُ اهْبِطْ بِسَلَامٍ مِّنَّا وَبَرَكَاتٍ عَلَيْكَ وَعَلَىٰ أُمَمٍ مِّمَّن مَّعَكَ ۚ وَأُمَمٌ سَنُمَتِّعُهُمْ ثُمَّ يَمَسُّهُم مِّنَّا عَذَابٌ أَلِيمٌ) وكثير من العلماء أن مكنش كلهم بيسموا نوح عليه السلام آدم الثاني، لأن كل البشرية بعد الطوفان هي من ذرية نوح عليه السلام، "وجعلنا ذُريّته هُم البَاقِين" فربنا لم يجعل ذرية ونسل للمؤمنين إللي كانوا مع نوح عليه السلام. فالبشرية كلها من نسل سام وحام ويافث، قال رسول الله صلى الله عليه وسلم: "سام أبو العرب، وحام أبو الحبش، ويافث أبو الروم" نزل نوح عليه السلام والمؤمنون من السفينة ونزلت الحيوانات إللي كانت معاه، وعاش نوح على الأرض مع أبناؤه ومع المؤمنين في رخاء ونعيم، فكلهم طائعين عابدين لله مفيش أي كافر بينهم، إحساس جميل فعلا...🥹 "بلدةٌ طيبةٌ وربٌّ غفُور" بعد العمر الطويل ده كله ،ويقال إن نوح عليه السلام هو أطول الأنبياء عمرا،جاءت النهاية ...الموت ..فمهما عاش الإنسان لااازم هيجيله الموت حتى الملائكة هتموت في يوم من الأيام، "كلُّ مَن عليها فان" لما جت ساعة وفاة نوح عليه السلام وصى ابنه وصية قال : أنا بأمرك بحاجتين وبنهاك عن حاجتين.. أولا بأمرك بلا إله إلا الله ...فلو السماوات السبع والأراضين السبع اتحطوا في كفة ولا إله إلا الله في كفة هترجح كفة لا إله إلا الله.. ثانيا بأمرك بسبحان الله وبحمده، لأن فيها صلات كل شيء وبها يُرزق الخلق. بنهاك أولا عن الشرك وثانيا عن الكبر.. ثم مات سيدنا نوح عليه السلام .. هل استمرت الأرض على التوحيد بعد موت نوح عليه السلام ؟ ولا الناس عبدوا الأصنام مرة تانية؟ ده اللي هنعرفه المرة الجاية ان شاء الله💚💚💚💚🌴

فربنا أمر نوح إنه يصنع سفينة 🛳 وإنه يجمع فيها من كل مخلوق زوجين ذكر وأنثى، وعلمه سبحانه إزاي يصنعها ، ويُقال إن نوح عليه السلام كان يعمل نجار، (فَأَوْحَيْنَا إِلَيْهِ أَنِ اصْنَعِ الْفُلْكَ بِأَعْيُنِنَا وَوَحْيِنَا فَإِذَا جَاءَ أَمْرُنَا وَفَارَ التَّنُّورُ فَاسْلُكْ فِيهَا مِنْ كُلٍّ زَوْجَيْنِ اثْنَيْنِ وَأَهْلَكَ إِلَّا مَنْ سَبَقَ عَلَيْهِ الْقَوْلُ مِنْهُمْ وَلَا تُخَاطِبْنِي فِي الَّذِينَ ظَلَمُوا إِنَّهُمْ مُغْرَقُونَ ) نوح عليه السلام ساب الدعوة وتفرغ لصناعة السفينة لأن خلاص ربنا بعلمه قاله إن مفيش حد هيؤمن، قوم نوح رايحين جايين يتريقوا على نوح عليه السلام، يانوح إنت بقيت نجار بعد ما كنت نبي.. وطبعا لأنه كان بيبني سفينة على جبل ومفيش مية فكانوا بيقولوا إنه مجنون حد يبني سفينة على جبل! فنوح عليه السلام قالهم زي ما بتسخروا منا إحنا بنسخر منكم، هتشوفوا مين إللي ربنا هيبعت عليه عذاب وأدينا مستنيين..  (وَيَصْنَعُ الْفُلْكَ وَكُلَّمَا مَرَّ عَلَيْهِ مَلَأٌ مِنْ قَوْمِهِ سَخِرُوا مِنْهُ قَالَ إِنْ تَسْخَرُوا مِنَّا فَإِنَّا نَسْخَرُ مِنْكُمْ كَمَا تَسْخَرُون) (فَسَوْفَ تَعْلَمُونَ مَن يَأْتِيهِ عَذَابٌ يُخْزِيهِ وَيَحِلُّ عَلَيْهِ عَذَابٌ مُّقِيمٌ) ربنا كان مدي لسيدنا نوح عليه السلام علامة أول ما يفور التنور تبدأ تطلع السفينة إنت والمؤمنين والحيوانات إللي معاك على السفينة، والتنور في تفسيرات كتير منها إنه الفرن ، فأول ما يفور منه ماء يركب السفينة هو وإللي آمنوا معه، فلما نوح شاف العلامة كلهم ركبوا السفينة ، وبدأ المطر الشديد ينزل من السماء🌧 (حَتَّىٰ إِذَا جَاءَ أَمْرُنَا وَفَارَ التَّنُّورُ قُلْنَا احْمِلْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلَّا مَن سَبَقَ عَلَيْهِ الْقَوْلُ وَمَنْ آمَنَ ۚ وَمَا آمَنَ مَعَهُ إِلَّا قَلِيلٌ) (وَقَالَ ارْكَبُوا فِيهَا بِسْمِ اللَّهِ مَجْرَاهَا وَمُرْسَاهَا ۚ إِنَّ رَبِّي لَغَفُورٌ رَّحِيمٌ) والأرض بقت تطلع مية بكميات كبيرة ، وطبعا الناس بدأت تصرخ مش عارفين إيه إللي بيحصل ، المية مغرقة كل حاجة الزرع والبيوت وبدأت المية تعلى وتعلى والناس تغرق وهنا نوح عليه السلام شاف مين!! شاف ابنه وهو بيتسلق جبل وكانت المية لسه موصلتش للإرتفاع ده ، فنادى عليه نوح عليه السلام تعال اركب معنا (وَهِيَ تَجْرِي بِهِمْ فِي مَوْجٍ كَالْجِبَالِ وَنَادَىٰ نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ) فقال لأ أنا هطلع على الجبل وهو هينقذني من المية، لحد اللحظة دي مش قادر يستوعب إن نوح عليه السلام كان على حق ولا برده الكبر هو إللي منعه!!😞 (قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ) نوح عليه السلام نادى عليه قاله مفيش حد هينجو النهاردة من العذاب إلا إللي ربنا يرحمه، فجه موج عالي 🌊 وفصل بين الأب وابنه،( .. قَالَ لَا عَاصِمَ الْيَوْمَ مِنْ أَمْرِ اللَّهِ إِلَّا مَن رَّحِمَ ۚ وَحَالَ بَيْنَهُمَا الْمَوْجُ فَكَانَ مِنَ الْمُغْرَقِينَ) فضلت السماء تمطر والأرض تطلع مية لحد ما غطت المية كل رؤوس الجبال ، الأرض كلها غرقت، وكأن الله يريد إنه يغسل الأرض من الفساد ويعيد للأرض التوحيد مرة تانية، فمات كل من كان حيا على الأرض إلا من كان على السفينة. إيه إللي حصل بعد الطوفان ؟ وإيه هي وصية نوح لإبنه ؟ هنعرف الجزء الجاي إن شاء الله..♥️♥️♥️♥️🌴

«قصص_الأنبياء» #الحلقة_السابعة #قصة_نوح_(٢) كنا واقفين المرة إللي فاتت عند قوم نوح لما كانوا بيردوا على نوح وعمالين يقولوا حجج ويجادلوا نوح عليه السلام بالباطل عشان ميتبعوش الحق، فكانت آخر حجة إنهم قالوا إنت إزاي عايزنا نتبعك ونسمع كلامك وإنت إللي اتبعوك هم الفقراء والضعفاء وأصحاب المهن الوضيعة.. فنوح عليه السلام قال لهم: طيب وأنا مالي كانوا بيعملوا إيه، ناس آمنت واتبعت الحق يبقى أقبل منهم وقلوبهم دي بتاعة ربنا، هو المطلع عليها وهو إللي يحاسبهم أنا لي الظاهر . "قال وما علمي...." وأنا مش هطردهم، لو أنا طردتهم مين ينجيني من غضب ربنا عليّ لأني أسات لعباده الصالحين! " وَيَا قَوْمِ مَنْ يَنْصُرُنِي مِنَ اللَّهِ إِنْ طَرَدْتُهُمْ أَفَلَا تَذَكَّرُونَ" قوم نوح مسكتوش برده ومقتنعوش قالوا إنت بتفري الكلام ده ، وبتألف قالهم لو أنا بألف وبفتري الكذب أنا إللي هشيل الذنب ملكوش دعوة، وإنتم كمان هتشيلوا ذنب إنكم مسمعتوش الكلام، ركزوا في المهم القضية مش أنا كذاب ولا لأ...جربوا تسمعوا الكلام مش يمكن كلامي صح !! "ام يقولون افتراه قل ان افتريته فعلي اجرامي وأنا بريء مما تجرمون" ¤ وفي هنا ملحوظة وهي إن ربنا لما بيبعث نبي أو رسول بيكون من القبيلة نفسها يعني هم يعرفوه كويس ومعاشرينه وعارفين نسبه وأخلاقه وكل حاجة عنه، مش واحد غريب جاي من برة، والأنبياء أخلاقهم كريمة ومحدش منهم بيكذب أبدا وبيكونوا أشراف ونسبهم عالي في قومهم، عشان ميكنش لهم أي حجة في إنهم يردوا الحق، لما قوم نوح لقوا إن مفيش فايدة من نوح وإنه مصمم على الضلال بتاعه ده قالوا يانوح إنت بتجادل كتير ومش عايز تقتنع مش بتخوفنا بالعذاب خلاص هات العذاب إللي إنت بتقول عليه ده ! (قالوا يانوح قد جادلتنا فأكثرت جدالنا فأتنا بما تعدنا إن كنت من الصادقين ) سيدنا نوح قالهم أنا مش بإيدي حاجة لو ربنا أراد هينزل عليكم العذاب، ودي حاجة سهلة يعني إنتم مطلبتوش المستحيل ! "قال إنما يأتيكم به الله إن شاء وما أنتم بمعجزين". ولو ربنا لم يرد لكم الهداية مش هتنفعكم نصيحتي مهما قلت ، فهو أعلم إذا كنتم تستاهلوا الهداية فعلا ولا لأ.. أنا عايزاكم تتخيلوا إن نوح عليه السلام فضل يدعوا قومه سنييين طويله ٩٥٠ سنه!متخيلين مش مرة ولا مرتين ولا شهر ولا سنة ولا ١٠٠ سنه لا دول "ألف سنة إلا خمسين عاما" (وَلَقَدْ أَرْسَلْنَا نُوحًا إِلَىٰ قَوْمِهِ فَلَبِثَ فِيهِمْ أَلْفَ سَنَةٍ إِلَّا خَمْسِينَ عَامًا ) وكان بينوع في الأسلوب، يعني شوية باللين وشوية بالشدة ، شوية يُوْعدهم ويُبشرهم برحمة ربناوشوية يُخوفهم من عذابه، مش بس كده ده كان حتى بينوع في الوقت ... يعني كان بيدعوهم بالنهار في مجالسهم، وكان بيروح لهم بالليل لما يكونوا لوحدهم يدعوهم، لأن في ناس ممكن تكون اقتنعت بس خايفة تعلن الإيمان عشان محدش من أكابر القوم يؤذيهم وهم مش هيستحملوا الأذى، فهو جرب كل أساليب الدعوة!! "قال رب إني دعوت قومي ليلا ونهارا" طيب كان رد فعل قومه إيه بقى ! كل ماكان نوح عليه السلام عليه السلام يدعوهم يقوموا حاطين صوابعهم في ودانهم عشان ميسمعوش🙉 هل نوح قال خلاص أنا بقولهم وهم حتى مش عايزين يسمعوني فأنا مش هتكلم تاني؟ بالعكس بقى يشاورلهم بإيده بيدعوهم بإيده يشاور عالسماء وينصحهم بالإشارة !! فقوم نوح راحوا واخدين هدومهم وحاطينها على وشهم! كان ممكن يغمضوا عينهم ومع ذلك حطوا الهدوم على وشهم يعني مش عايزين نشوفك نهائي.. (وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أَصَابِعَهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا) نوح عليه السلام قعد يدعو قومه ويصبر على تريقتهم وأذاهم ، وكان عندهم حاكم. مَلِك يعني، كل ما كان نوح عليه السلام يدعو الناس ،الملك ده كان بيدعو الناس إنهم ميسبوش آلهتهم ويتمسكوا بعبادة الأصنام، إللي كانوا مسميينها وَد وسُواع ويَغوث ويَعوق ونَسر، (قَالَ نُوحٌ رَّبِّ إِنَّهُمْ عَصَوْنِي وَاتَّبَعُوا مَن لَّمْ يَزِدْهُ مَالُهُ وَوَلَدُهُ إِلاَّ خَسَارًا) (وَمَكَرُوا مَكْرًا كُبَّارًا) (وَقَالُوا لا تَذَرُنَّ آلِهَتَكُمْ وَلا تَذَرُنَّ وَدًّا وَلا سُوَاعًا وَلا يَغُوثَ وَيَعُوقَ وَنَسْرًا) • طيب عارفين بعد كل المجهود إللي عمله ده كله والدعوة خلال السنين دي كلها ، آمن معاه كم واحد!؟ يعني على الأقل خااالص لو كل يوم آمن واحد بس هيكون معانا ٩٥٠ إنسان مؤمن، لكن لأ ! أكثر قول في إللي آمنوا مع نوح قالوا إنهم ٨٠ رجل وامرأة . وده نبي مرسل ومن أولو العزم من الرسل ومؤيد من الله واستعمل كل أساليب الدعوة ومع ذلك آمن معاه العدد البسيط ده خلال السنين الطويلة دي.. قوم نوح أصروا على الكفر ، وربنا أوحى لنوح عليه السلام إن خلاص محدش هيؤمن من قومك إلا إللي آمنوا خلاص، (وَأُوحِيَ إِلَى نُوحٍ أَنَّهُ لَنْ يُؤْمِنَ مِنْ قَوْمِكَ إِلَّا مَنْ قَدْ آمَنَ فَلَا تَبْتَئِسْ بِمَا كَانُوا يَفْعَلُونَ ) فنوح عليه السلام في اللحظة دي دعا على قومه إن ربنا يهلكهم ،عشان أفسدوا في الأرض وكل ذريتهم بعد كده هتكون مفسدة في الأرض، (وَقَالَ نُوحٌ رَّبِّ لا تَذَرْ عَلَى الأَرْضِ مِنَ الْكَافِرِينَ دَيَّارًا) (إِنَّكَ إِن تَذَرْهُمْ يُضِلُّوا عِبَادَكَ وَلا يَلِدُوا إِلاَّ فَاجِرًا كَفَّارًا)

السلام عليكم .. دلوقتي في ناس كتير اوي متعرفش اي أهمية فلسطين اصلا بالنسبة للمسلمين ودي حاجه مهمة جدا اننا نعرفها بل ونعرف الكبار والصغيرين اهمية بيت المقدس والمسجد الاقصي .🫀 نبدأ من الاول خالص .. سيدنا ابراهيم عليه السلام هاجر لفلسطين وسيدنا لوط عليه السلام نجاه ربنا من العذاب الذي نزل علي قومه الي الارض المباركة وهي فلسطين .. وسيدنا داود عليه السلام عاش بفلسطين وبنى محرابه فيها ،وسليمان عليه السلام حكم العالم كله من فلسطين ..وقصته الشهيرة مع النملة التي خاطبت النمل وقالت لهم (يا ايها النمل ادخلو مساكنكم) كان بمكان يسمي وادي النمل بفلسطين وهو بجوار (عسقلان) وفيها كذلك محراب زكريا عليه السلام . كما ان موسي عليه السلام طلب من قومه ان يدخلو الارض المقدسه..وسماها مقدسه أي مطهره التي طهرت من الشرك وجلعت مسكنا للأنبياء، وحصل فيها معجزات كتير جدا منها ولاده عيسي عليه السلام من امه مريم وهي فتاه صغيره غير زوج ..وقد رفعه الله اليه عندما قرر بنو اسرائيل قتله .. ومن علامات اخر الزمان فيها ان عيسي عليه السلام سينزل عند المنارة البيضاء وانه هيقتل المسيح الدجال عند باب اللد ف فلسيطن .. وهي ارض المحشر والمنشر .. وان يأجوج ومأجوج سيقتلون علي ارضها في اخر الزمان وقصص كثيرهحصلت ف فلسطين منها قصه طالوت وجالوت .. إن المسجد الاقصي له قدسية للمسلمين في مشارق الارض ومغاربها مش بس الفلسطينيين !! الاقصي كان القبلة الاولي للمسلمين وربنا امر النبي بتحويل القبلة الي المسجد الحرام .. (قد نرى تقلب وجهك في السماء فلنولينك قبلة ترضاها فولِ وجهك شطر المسجد الحرام وحيث ما كنتم فولوا وجوهكم شطره ان الذين اوتو الكتاب ليعلمون انه الحق من ربهم وما الله بغافل عما يعملون ولئن أتيت الذين أوتوا الكتاب بكل آية ما تبعوا قبلتك وما أنت بتابعِ قبلتهم وما بعضهم بتابع قبلة بعض ولئن اتبعت اهواءهم من بعد ما جاءك من العلم إنك لمن الظالمين) البقره ١٤٤/١٤٥ رحلة الاسراء والمعراج كانت بسيدنا محمد صلي الله علية وسلم أُسريَ من مكه الي المسجد الاقصي وأُعرج به الي السماء العليا و كان النبي إماما بالانبياء ف الاقصي..وف السماء العليا فرضت علية الصلاه .. الاقصي من المساجد التي تُشد إليها الرحال .. عن أبي سعيد الخدري ،عن النبي صل الله عليه وسلم أنه قال «لا تشد الرحال الا لثلاث مساجد :مسجد الحرام ،مسجد الاقصي ،مسجدي هذا» •قيمة الصلاه ف المسجد الاقصي تعادل 500 صلاه ..عن جابر بن عبدالله ،عن النبي صل الله عليه وسلم انه قال :«صلاة في المسجد الحرام مائة الف صلاة ،وصلاة في مسجدي ألف صلاة ،وفي بيت المقدس خمسمائة صلاة» الاقصي قبلة الانبياء جميعا قبل النبي ،وهو القبلة الاولي التي صلي اليها النبي قبل ان تغير القبلة الي مكه الاقصي هو المسجد الذي أمر النبي الصحابة بالبقاء بقربه .. وف النهاية ارجو الدعاء لأهل فلسطين دعوة اللهم هذا حالنا لا يخفى عليك وضعفنا ظاهر بين يديك فانصرنا بنصرك واغفر لنا ذنوبنا واستر عيوبنا يا أرحم الراحمين، لا تؤاخذنا بما فعل السفهاء منا، لا تؤاخذنا بما نسينا أو أخطأنا. نعوذ بكَ يا الله من هذا العجز ونحن نرى إخواننا ولا نستطيع صرفًا ولا دفعًا ولا وصولًا ‏اللهم إنا نشكو إليك ضعف قوتنا وقلة حيلتنا وهواننا على الناس ‏اللهم إنّا نستودعك المسجد الأقصى مسرى رسول الله يا من لا تضيعُ عنده الودائع فاحفظهم بحفظك ورعايتك.🥹💚💚💚💚💚

فقال لهم نوح : انا معايا دليل من ربنا وعلم إني أتبعه وأكون عبد لله بس ولا أعبد الأصنام وربنا وفقني وهداني لطاعته وإنتم مش شايفين الحق ده ولا عايزين تقتنعوا وتؤمنوا بالله أنا مقدرش أَلزِمكم إنكم تتبعوني وتسمعوا كلامي! "قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي رَحْمَةً مِنْ عِنْدِهِ فَعُمِّيَتْ عَلَيْكُمْ أَنُلْزِمُكُمُوهَا وَأَنْتُمْ لَهَا كَارِهُونَ" وأنا مش عايز منكم مقابل ولا عايز ملك ولا مال ولا أي حاجة كل إللي أنا بطلبه إنكم تُسلموا لله وتطيعوا أوامره، ربنا هو إللي هيأْجرني ! "وَيَا قَوْمِ لَا أَسْأَلُكُمْ عَلَيْهِ مَالًا إِنْ أَجْرِيَ إِلَّا عَلَى اللَّهِ" هل اقتنع قوم نوح عليه السلام ؟ طلعوا بحجة جديدة قالوا له إنت إزاي عايزنا نتبعك ونسمع كلامك وإنت إللي اتبعوك هم الفقراء والضعفاء وأصحاب المهن الوضيعة! اطردهم واحنا نقعد معاك ونتفاوض .. "قَالُوا أَنُؤْمِنُ لَكَ وَاتَّبَعَكَ الْأَرْذَلُونَ " ياترى نوح رد عليهم قالهم إيه؟ وهل في النهاية استجاب قوم نوح لعبادة ربنا ولا استمروا في العناد والكبر؟ ده إللي هنعرفه في الجزء الجاي إن شاء الله ..♥♥♥♥🌴